Tulay Wala Kapahimusli

Ang taytayan nga nagdugtong sa Singson Village paingon sa Barangay Kalunasan gigastohan sa kagamhanan og dul-an sa P50 milyones aron unta makatabang pagpaluag sa trapiko sa dalan Escario apan wala kaayo kini kapahimusli.

Hangtod karon maihap ra sa tudlo ang mga sakyanan nga moagi sa mao nga karsada bisan og makapadali unta kini sa biyahe gikan sa Barangay Guadalupe paingon sa Lahug, ug gikan sa Lahug paingon sa Guadalupe.

Kini tungod kay gawas nga bati ug hagip-ot pa kaayo ang karsada habig sa Guadalupe paingon sa taytayan, daghan sa mga motorista ang wala pa kaayo masuheto nga adunay kalaktoran sa pag-agi sa mao nga dapit.

Kanunay’ng makasinati og grabe’ng problema sa trapiko ang dalan Escario atol sa “peak hours” sa buntag ug sa gabii.

Si Mayor Michael Rama dugay ra kaayo nga mimando sa kadagkoan sa Department of Engineering and Public Works (DEPW) nga aspaltohon ang karsada nga gikan sa Andres Abellana nga paingon sa tulay nga nagdugtong paingon sa Kalunasan apan wala pa matuman.

Ang problema mao nga ang dakbayan sa Sugbo nagnihit karon og aspalto nga magamit sa pagtuman sa kamandoan sa mayor. Gikan sa Barangay Guadalupe, ang Lahug mahimo’ng biyaheon lang og dies minutos kun anha moagi sa maong laktud nga karsada.

Ang karsada adto mosangko sa gitawag og Obedience Street, dayon molusot na usab paingon sa Beverly Hills ug ngadto na sa Sitio Sudlon sa Lahug, ug molusot sa Gorordo Avenue.