City Treasurer’s Office Gidestinohan og Police

Gidestinohan na og mga polis ang Cebu City Treasurer’s aron nga makabantay adlaw ug gabii sa tumong nga malikayan nga mabiktima kini sa pagpangawat sama sa nahitabo sa ubang treasurer office.

Gawas niini, si Cebu City Police Office (CCPO) director Noli Romana mihimo pa gayud og personal nga pakisusi sa Cebu City Hall aron mahimoan niya og “assessment” ang siguridad.

Matud ni Romana nga adunay angay’ng usbonon sa mga pamaagi diha sa City Hall aron malikayan nga masundog ang nahitabo sa mga treasurer’s offices sa kalungsoran ug sa dakbayan sa Toledo.

Si Romana hinuon miingon nga ang nakabentaha sa dakbayan sa Sugbo kay kompleto kini og mga Closed Circuit Television (CCTV) camera nga gimontar sa lainlaing dapit sa City Hall.

Ang tawo nga mopaduol sa City Hall makita na sa mga CCTV camera, ug labaw na kon mosulod na kini sa treasurer’s office nga gipangbutangan og hilabihan kadaghan nga mga CCTV camera.

Si Romana nanglantaw nga lisod nga matulis ang City Treasurer’s Office ug kon kini mahitabo, andam siya nga moluwat sa iyang katungdanan isip hepe sa kapolisan dinhi sa dakbayan.