Presyo sa Kandila Mosaka Sugod Sept.17

Giaghat sa kagamhanan ang publiko sa pagpamalit og kandila mintras sayo pa, tungod kay sugod sa Septembre 17, 2014 mosaka na og 2 porsento ang presyo sa kandila.

Si Undersecretary Victorio Mario A. Dimagiba sa Consumer Protection Group sa Department of Trade and Industry (DTI) mibutyag nga bugtong hinungdan niini mao ang pagsaka sa presyo sa wax o espirma, ang labing mahinungdanon nga sagol sa pagbuhat og kandila.

Gumikan niini giaprobahan na sa DTI ang kausaban sa presyo sa maong palaliton sugod sa Septembre 17, nagkanayon si Dimagiba. Matud pa ni Dimagiba nga nasuta sa DTI nga nagpadayon ang pagsaka sa presyo sa espirma tulo na ka tuig ang milabay.

Gikan sa P88 ang kilo gikan sa 2011, misaka kini ngadto sa P94.60 niining tuiga, 2014.

Hinuon mipasidaan si Dimagiba sa pagtaho sa ilang mga buhatan kutob sa masakpan nila nga may mopasaka sa presyo niini sa wala pay Septembre 17.

Subay sa Republic Act No. 7581 o ang Price Act, ang silot sa subrang pagpaginansya sa presyo sa kandila, silotan gikan sa 5 ngadto sa 15 ka tuig nga pagkabilanggo, ug multa nga gikan sa P5 mil ngadto sa P1 milyon, sumala ni Dimagiba.

Sa laing bahin, ang kandila, nahilakip na usab sa mga produktong basic commodities subay sa Price Act, ug usa na usab kini sa bantayanan sa DTI, dugang ni Dimagiba.