Popcom 7: Internet Nakapadasig sa Pakighilawas

Ang mga batan-on sa Central Visayas nga nakasud-ong sa mga nagkadaiyang talan-awon sa teknolohiya sa internet labing nagdasig kanila pagsalmot sa mga buhat nga pakighilawas.

Usa kini sa mga dagkong isyu nga gishigutan sa mga tinugyanan sa Commission on Population (PopCom)7 sa Kapihan sa Philippine Information Agency (PIA).

Si PopCom7 planning officer Myerna Alaba nagkanayon nga ang pagsaka sa information technology nagpadaghan usab sa nagkalainlaing matang kalihukang sexual, nagkadaiyang paagi pakigkita og ikapares sa kama nga mosangpot sa negatibong epekto sa usa ka batan-ong babaye o kaha lalaki.

Matud pa ni Alaba nga ang internet usa sa tinubdan nga nagtudlo og pakighilawas sa mga batan-on.

Gibutyag ni Alaba nga misaka ang gidaghanon sa mga batan-ong babaye nga hinan-aw og X-rated video (Salida sa pakighilawas) gikan sa 36.9 porsento sa tuig 2002 ngadto sa 47.5 porsento sa tuig 2013.

Samtang mikibra usab ang mga lalaki nga hinan-aw og video sa pakighilawas gikan sa 78.4 porsento sa 2002 ngadto sa 76 porsento sa 2013.

Nasuta usab ni Alaba nga duha sa matag napulo ka mga batan-on sa Central Visayas ang makadawat og video sa maghilawas pinaagi sa cell phone o kaha sa internet.

Gibutyag usab ni Alaba nga kasagaran sa mga batan-on sa Central Visayas babaye ug lalaki nga hilig kaayong mo-rekord sa ilang pakighilawas sa kama.

Samtang gibutyag ni POPCOM Information Officer Darlynn Remolino nga base sa survey ngadto sa 1,425,883 ka mga batan-on sa rehiyon, sa tuig 2013, mikapin sa 503 mil kanila ang nakatilaw na og pakighilawas sa ilang mga uyab nga walay gamit-gamit og mga proteksyon sama sa condom, ug uban pa.

Mokabat usab og 73 mil ka mga batan-on ang panagsa ra nga makatilaw og pakighilwas, samtang 29 mil gikan sa 725,706 ka mga batan-ong lalaki ang nakighilawas usab og lalaki.

Mokabat usab og 49 mil ka mga babayeng nagpangidaron og 15-19 ang nagsabak na.

Gumikan niining makapakurat nga lihok sa mga batan-on karon giawhag sa Popcom ang mga ginikanan nga bantayan pag-ayo ang ilang mga anak.