Laing Pito Napositibo

Pito na usab ka kawani sa duha ka barangay dinhi sa dakbayan ang namatud-an nga adik sa gidili nga drugas human sila mapositibo sa drug test nga gihimo niadtong adlawng Biyernes.

Si Dr. Alice Utlang, hepe sa Cebu City Office for Substance-Abused Prevention (COSAP), miingon nga 83 ka kawani sa Barangay Quiot ang gihimoan nila’g drug test ug napositibo ang usa ka street cleaner ug garbage loader.

Sa Barangay Kalunasan gi-drug test usab sa mga sakop sa COSAP ang 120 ka kawani ug pito kanila ang napositibo sa paggamit og gidili nga drugas nga shabu.

Wala pa hinuon makakuha og detalyi si Utlang kon unsay trabaho sa pito ka mga kawani sa Barangay Kalunasan, apan sigurado nga walay bisan usa kanila nga opisyal sa barangay.

Pagka karon, miabot na og 190 ka kawani sa kabarangan dinhi sa dakbayan sa Sugbo ang namatud-an nga mga tiggamitan sa gidili nga drugas. Kapin pa sa 20 ka barangay dinhi sa dakbayan ang wala pa kahimoi og drugtest ang mga kawani.