SSS Midubli ang Kita sa Tuig 2014

Ang Social Security System (SSS) midubli sa iyang kita sa unang tunga sa tuig sa 2014 diin miposti kini og P32.59 bilyones gikan sa P15.73 bilyones sa susamang mga buwan sa tuig 2013.

Matud pa ni SSS President ug Chief Executive Officer Emilio S. de Quiros Jr., nga ang 107 porsento nga usbaw nga mokabat og P16.37 bilyones resulta kini sa kadako sa financial assets sa SSS.

Gipasabot ni De Quiros nga ang nahadugang sa kinitaan sa SSS sulod sa unang unom ka buwan niining tuiga nga mikabat og P75.37 bilyones, naglangkob sa mga amot gikan sa iyang mga membro nga mikabat og P58.77 bilyones ug dugang pang kinitaan gikan sa ubang tinubdan nga mikabat og P16.60 ka bilyon.

Ang mga amot sa iyang mga membro sa maong periodo nga mikabat og P50.74 bilyones, gipun-an sa mga boluntaryong amot sa ubang tinubdan nga mikabat usab og P5.25 bilyones ug ingon man amot sa gitawag nga self-employed nga mga membro nga mikabat og P2.78 ka bilyon.

Midugang si De Quiros nga ang nabayad sa SSS sa mga benepisyo sa mga membro niini mikabat usab og P49.52 bilyones itandi sa P43.46 bilyones lamang sa tuig 2013.

Nagkanayon si De Quiros nga, “The SSS remains to be in a healthy financial condition given a net revenue of P22.17 billion. Latest projections indicate that SSS will continue to generate a positive net revenue up until 2018, where contributions collection and investment income will continue to outstrip benefit payments and operating expenses.”

Hinlo kaayo ang kondisyon sa panalapi sa SSS diin mikita kini og limpyo nga P22.17 bilyones karon.

Gibana-bana usab nga magpadayon ang positibo sa maayong kinitaan sa maong ahensya hangtud sa tuig 2018 diin ang mga amot gikan sa mga membro ug uban pang kinitaan molabaw kay sa mga bayranang benipisyo niini ngadto sa iyang mga membro, sumala pa ni De Quiros.