DOH-7: ‘Ice Bucket Challenge’ Ilikay sa mga Masakiton

Mipahimangno ang Department of Health (DOH)7 nga sutaon una ang kahimtang sa panglawas sa mga mosalmot sa dili pa mosanong sa sikat kaayo nga “ice bucket challenge.”

Kini aron masiguro nga dili makahatag og dugang sakit ang maong kalihukan ngadto sa mosalmot niini kansang lawas bubo-an og bugnaw nga tubig.

Ang buhatan ni DOH-7 regional director Dr. Jaime Bernadas mibutyag nga angayan nga magmatngon ang mga tawo nga may sakit sa kasingkasing aron makalikay sa atake sa sakit sa kasingkasing.

Gitataw hinuon ni Bernadas nga maayo ang katuyoan sa “ice bucket challenge” apan giawhag niya nga dili mosalmot ang taas na og edad o kaha mga bata pa nga may sakit kay dili kini luwas alang kanila.

Nasayran nga dinhi sa Sugbo ang mga dagkong mga opiysal sa gobyerno apil na si gobernador Hilario Davide III sa lalawigan sa Sugbo ug ingon man ang mga beteranong mga media personalities misanong sa hagit ug gustong mosalmot sa naasoy nga ice bucket challenge.