MOU Alang sa Karsada, Gipirmahan sa NEDA ug mga Gobernador

Ang mga gobernador sa Central Visayas, sa Cebu, Bohol, Negros Oriental ug Siquijor, niadtong Miyerkoles mipirma og memorandum of understanding (MOU) tali sa National Economic and Development Authority (NEDA) 7, ingon man sa Australian Aid ug ang The Asia Foundation in the Philippines alang sa mga bag-ong karsada og mga kausabang inprastraktura.

Ang pagpinirmahay gipahigayon atol sa paglusad sa “Coordinating Roads and Infrastructure Investment for Development” (CR+ID) project didto sa Harold’s hotel, sa Cebu City.

Matud pa ni Australian Embassy Deputy Head of Mission, Hon. David Dutton nga ang kagamhanan sa Australia pinaagi sa Australian Aid (AusAID) daan na nga kaabag sa Pilipinas sa mga proyekto niini sa kaugmaran alang sa kauswagan sa ekonomiya sa Pilipinas.

“We need to work creatively, to look for innovations to create economic growth in the Philippines”,(Kinahanglang magmakugihon kita sa pagtrabaho, mangita og mga bag-ong imbento aron matukod ang kauswagan sa ekonomiya sa Pilipinas), sumala ni Dutton.

Nagkanayon usab si Dutton, nga ang AusAID nakigsuod sa nagkalainlaing sektor nga may labot pagbantay sa panglawas, panguma, inprastraktura,panglangtaw nga timbang sa mga lalaki ug babaye, ug kanunay nga modiskobre og bag-ong mga imbento aron makab-ot ang maayong mga sangpotanan.

Gisubli ni Dutton ang gipahayag ni Presidente Benigno Aquino sa iyang state of the nation address (SONA) nga nag-ingon, “Good economics is good government”, “which sums up why the CR+ID expands in Central Visayas,”(Ang maayong ekonomiya maayong panggobyerno, ug maoy hinungdan nga gipalapdan sa CR+ID ang iyang mga proyekto sa Central Visayas), matud pa ni Dutton.