Pulis nga Migamit sa Auto nga Ebidensya, Silotan ni Rama

Gusto g’yud ni Mayor Michael Rama nga masilotan si Chief Inspector Noli Cernio kon tinuod man nga gigamit niya ang sakyanan nga na-recover sa kapolisan ug ebidensya sa usa ka kaso.

Matud ni Rama nga dili siya gusto nga adunay mga polis nga madistino dinhi sa dakbayan sa Sugbo nga magbinuang sa ilang serbisyo kay angay gani sila nga magsilbi nga modelo sa publiko.

Gigamit ni Cernio ang 2000 Model nga Mitsubishi Lancer nga na-recover sa mga sakop sa TRS nga gigamit og mga dautang elemento.

Hinuon, si Cebu City Police Office (CCPO) director Noli Romana mitangtang na ni Cernio isip hepe sa Punta Princesa Police Station samtang magpadayon ang imbestigasyon sa iyang kaso.

Gawas ni Cernio, girelibohan usab ni Romana sila si Senior Inspector Elizandro Quijano pagka hepe sa homicide section ug si Inspector William Alicaba nga deputy chief sa Station -2.

Si Rama miingon nga wala g’yud siya malipay nga nakadungog sa balita nga ang sakyanan nga na-recover sa kapolisan gigamit-gamit ra sa hepe.

Gipikhan hinuon ni Rama ang iyang mga konsehal nga wala mosuporta sa iyang tinguha kaniadto nga ang kapolisan palitan og sakyanan.