DepEd 7: Mga Karaang Kahoy Sulod sa Eskuylahan Ipaputol

Ipaputol usab sa Department of Education (DepEd) 7 ang mga karaan ug tigulang nga mga kahoy sa sulod sa mga tulunghaan sa tibuok Central Visayas aron masiguro nga walay mga tinun-an nga matumbahan niini.

Si DepEd-7 Regional Director Carmelita Dulangon mibutyag kagahapon sa buntag nga mipagawas na siya og kamandoan ngadto sa mga division school superintendent sa DepEd Central Visayas sa paglukat og tree cutting permit sa Department of Environment and Natural Resources (DENR) 7.

Kini aron sa pagpamutol sa mga kahoy nga anaa sa sulod sa tulunghaan nga maghatag og hulga sa kinabuhi sa mga kabataang nanagtungha.

Giasoy ni Dulangon nga nakasugat na siya og insidente niadtong siya pa ang division school superintendent sa syudad sa Talisay nga may duha ka bata ang nahospital human madat-ogi sa dakong sanga sa punoan sa kahoy nga natumba tungod sa kagulang na niini.

Nagkanayon si Dulangon nga dili siya buot nga masubli pa ang nahitabo sa duha ka mga bata sa syudad sa Talisay ngadto sa mga tinun-an sa sulod sa mga tulunghaan sa Central Visayas hinungdan nga gimando niini ang pagputol sa mga karang kahoy nga angayan nang putlon.

Iya hinuon nga gitataw nga ilang itugyan ngadto sa mga opiysal sa DENR-7 ang pagsusi ug paghukom kun angayan na ba putlon ang mga punoan sa kahoy sa sulod sa mga school campus nga ilang lukatan og cutting permit.