Archbishop Palma Pabor sa Pagpamutol sa Kahoy

Ang labaw’ng opisyal sa kaparian nga Katoliko dinhi sa Sugbo mibutyag nga pabor siya nga pangputlon ang mga dagko’ng kahoy nga anaa mitubo sa daplin sa national highway sa Naga, San Fernando ug Carcar kon masuta nga kini nakahatag og kakuyaw sa katawhan.

Si Cebu Archbishop Jose Palma mihatag sa iyang baruganan taliwala sa kontrobersiya nga namugna kon angay ba nga pangputlon ang mga “century-old” nga mga Acacia, nga ang uban niini nangatumba na og may mga sakyanan ug kabalayan nga natumbahan.

Gipasabot ni Bishop Palma nga nakasabot siya nga angay unta ipabilin ang mga kahoy kay makahatag kini og balanse nga epekto sa atong kalikupan, apan mas bililhon ang kinabuhi sa katawhan.

Si Secretary Ramon Paje sa Department of Environment and Natural Resources (DENR) mipahunong sa pagpamutol sa dagkong kahoy daplin sa karsada tungod sa pagsupak sa mga environmentalist.

Ang usa sa mga ilado nga pari dinhi sa Sugbo nga si Monsenyor Esteban Binghay misaysay nga diriyot g’yud siya matumbahi sa dakong punoan sa Acacia didto sa San Fernando.

Matud ni Binghay nga ikatulo nga sakyanan ang iyang gisakyan diha nga natumba pagkalit ang punoan sa Acacia bisan og walay kusog nga hangin nga mihuros.

Nabantayan nga daghan sa mga dagko’ng punoan sa Acacia diha sa mao nga dapit, bisan na dinhi sa dakbayan sa Sugbo, nangatumba lang nga wala hilabti kay lungag na ang tunga nga bahin sa iyang lawas.

Pipila ka dagko’ng punoan sa Acacia atubangan sa Cebu City Hall ug diha mismo sa atubangan sa simbahan sa Mabolo natumba tungod sa kagabok na sa maong kahoy.