Cash Assistance sa Mga Seniors, Nasugdan na og Hatag

Ang mga opisyal sa kabarangayan ug mga senior citizens dinhi sa dakbayan sa Sugbo gipahatagan na usab og dugang cash assistance ni Mayor Michael Rama.

Puwerte’ng lipaya sa mga senior citizens nga napun-an og P2 mil ang gipanghatag kanila ug gihimo kini kaniadto’ng Sabado didto sa lainlaing kabarangayan sa dakbayan.

Dili pa hinuon ang tanang 58 mil ka senior citizens ang nakakolekta dayon apan si City Treasurer Diwa Cuevas mibutyag nga kadto’ng wala makakolekta sa barangay mahimo nga adto na sila mokobra sa City Hall hangtod sa kataposan karong buwana.

Kon dili nila makobra hangtod sa kataposang adlaw ni’ng buwana, dili na g’yud nila makolekta pa ang ‘tag P2 mil. Miabot na og P5 mil nga cash assistance para karong tuiga ang nahatag sa City Hall sa mga senior citizens.

Matud ni Cuevas nga kay P12 mil man ang gisaad ni Mayor Rama nga ipahatag sa matag senior citizens mao nga giaprobahan ang gahin nga P720 milyones, nagpasabot kini nga may kolektahonon pa nga P7 mil kada senior citizens.

Sa laing bahin, ang mga opisyal sa kabarangayan gipahatagan usab ni Mayor Rama sa ilang dugang honoraryom sa City Hall para sa buwan sa Abril, Mayo ug Hunyo.

Ang kapitan gihatagan og ‘tag P15 mil, ang mga konsehal ‘tag P9 mil ug P6 mil sa mga barangay secretary ug treasurer.

Si Mayor Rama miingon nga ang paghatag niya og dugang honoraryom sa mga opisyal sa kabarangayan gitumong aron sila madasig nga moserbisyo pag-ayo alang sa kaayohan sa ilang lumolupyo.