Mga Opisyal sa Naga Mibahad, Dili Motabang sa DENR ug DPWH

Mibahad ang mga opisyal sa syudad sa Naga nga dili mosuporta sa Department of Environment and Natural Resources (DENR)7 ug Department of Public Works and Highways (DPWH)7 sa pagpanambal sa mga karaang kahoy nga anaa sa daplin sa nasudnong karsada.

Nasuta nga tambalanan ang maong mga kahoy aron mobalik ang kahimsog niini ug molig-on batok sa mga bagyo, linog ug uban pang katalagman, sumala ni Dr. Roger Guzman, forestry professor sa UP Los Baños nga mi-inspection sa maong mga kahoy.

Giharos pagsusi ni Dr.Guzman ang mga karaang kahoy sa daplin sa national highway gikan sa Naga, San Fernando ug Carcar uban ang mga foresters sa DENR-7.

Nasuta ni Dr. Guzman nga walay dakong hulga batok sa mga motorista base sa kasamtangang kahimtang sa maong mga kahoy nga gitinguha untang purilon sa DENR-7 ug DPWH-7.

Gipasalig ni Guzman nga molahutay pa og 20 ngadto sa 30 ka tuig ang kalig-on sa maong mga kahoy kun matapakan lamang og semento ang mga lungag sa lawas niini, apan kinahanglang pul-ongan kini sa mga sanga nga nag-ambo sa karsada.

Si Naga city mayor Valdemar Chiong miingon nga ilang subayon ang nahaunang findings sa mga foresters sa DENR-7 nga ipaputol na gyud ang maong mga kahoy kay naghatag kini og risgo sa kinabuhi sa mga residente ug sa mga motorista.

Apan miingon si Chiong nga kun igo lamang kining ayum-ayomon walay kasiguroan nga mohatag kini’g kaayohan sa kinabuhi ug kabtangan.

Bisan si Gobernador Hilario Davide III miingon nga iyang hangyoon si DENR Secretary Ramon Paje nga tugotan ang DENR7 ug DPWH7 sa pagpadayon sa pagpuo sa maong mga kahoy.

Hinuon ang forestry professor sa UP Los Baños nitug-an nga ang angayan nga mopa-rehabilitate sa maong mga kahoy mao ang DPWH-7 uban ang abag sa DENR-7 sanglit anaa man kini nahimutang sa daplin sa dalan.