City Hall Nakigtambayayong sa Operation Bigay Lunas

Gitun-an na karon sa kadagkoan sa dakbayan sa Sugbo kun unsa ang mga kumon kaayo nga sakit sa mga kabus nga lumolupyo aron mahatagan kini nila og diha-diha nga pagtagad pinaagi sa paghatag og tambal.

Si City Administrator Lucelle Mercado miingon nga nakigtambayayong sila sa Operation Bigay Lunas (OBL) sa Mercury Drug Foundation sa paghimo og pakisusi.

Matud ni Mercado nga nahibaw-an nga sa 3,071 ka pasyente nga gihimoan og pasiuna nga pagtuon, ang kadaghanan naghambin og ubo. Gikan sa walo ka barangay ang 886 nga gipang-ubo.

Ang walo ka barangay mao ang Tisa, Calamba, Labangon, Punta Princesa, Mambaling, Quiot, Pamutan ug Toong, pulos nahimutang sa south district sa dakbayan.

Wala pa’y resulta gikan sa mga barangay nga sakop sa north district dinhi sa dakbayan sa Sugbo.

Si Mercado miingon nga ang mga sakit nga daghan og pasyente mao ang hubak, hilanat, high blood pressure, kakuwang ug bitamina mao nga nangluspad ang mga hingtungdang pasyente uban pa.

Ang dakbayan sa Sugbo padayon nga mihatag og mga tambal niadto’ng mopahimulos sa gitawag og City Hospitalization Assistance Medicines Program (CHAMP) diin ang matag “beneficiary” makapahimulos og mga tambal nga bali’g P5 mil kun wala sila ma-admit sa ospital.

Matud ni Mercado nga kun ma-admit ang pasyente sa ospital ang ilang mapahimuslan P25 mil.

Image Credit: Cebu City PIO