“No Relation, No Ride” Policy, Gisugyot ni Sen. Tito Sotto

Baynte Mil nga multa sa mga tag-iya’g motorsiklo nga mopaangkas og ilang mga amigo mao ang gisugyot nga balaodnon ni Senador Vicente “Tito” Sotto.

Kini maoy nahuna-hunaang lakang ni Sotto isip pang-alkontra sa mga tulisan nga magsakay og motor.

Ang Senate Bill 2344 magtugot lamang sa tag-iya sa motor nga mopaangkas sa iyang asawa ug mga anak. Apan ang iyang gisugyot nga balaudnon nakasugat og grabe’ng pagsaway sa mga tag-iya’g motorsiklo ug bisan na sa ubang mga opisyal lakip ni Vice Mayor Edgardo Labella.

Si LTO-7 Regional Director Arnel Tancinco mitataw usab nga maglisod sila pagpatuman niini kun maaprobahan kay pipila ra ang ilang mga sakop ug mahurot ang ilang oras niini.

Matud ni Tancinco nga magkinahanglan nga ang mga drayber sa motor magdala-dala og kopya sa birth certificate sa ilang sakop sa pamilya nga paangkason.

Nabatasan na sa mga Filipino nga mopasakay sa mga amigo kun ang iyang biyahe paingon usab sa adtoan sa iyang higala apan kun kini’ng balaora maaprobahan sila multahan na og P20 mil ug tag P10 mil sa sunod nga kalapasan.