DENR7: Pagpamutol sa Kahoy Dili Masubasta

Giklaro sa Department of Environment and Natural Resources (DENR) 7 nga lisod ipatuman ang sugyot ni San Fernando mayor Antonio Canoy nga ipaagi og bidding o subasta ang pagputol sa mga tiguwang na nga kahoy.

Ang maong mga kahoy sa daplin sa San Fernando highway naghatag na og hulga sa mga motorista ug mga residente sa maong lungsod.

Gusto ni mayor Canoy nga ipaagi sa subasta aron makatabang usab ang mga pribadong kompanya sa DENR-7, Local Government Unit (LGU) ug Department of Public Works and Highways (DPWH) 7 sa pagputol sa maong mga kahoy.

Si DENR-7 Regional Executive Director Isabelo Montejo nagkanayon nga ang ilang buhatan dili mahimong makapahigayon og bidding sa pagputol sa mga kahoy tungod kay nagbarug pa man kini ug dili madeterminar kun pila ang gastos sa pagputol niini.

Nasayran nga ang sugyot ni mayor Canoy gipaluyohan ni Naga mayor Valdemar Chiong, Carcar mayor Necipuro Apura ug ni Gov. Hilario Davide III.

Samtang gipahibawo ni Montejo nga ang pagputol sa pito ka karaan ug tigulang na kahoy sa syudad sa Naga aduna nay pagtugot.

Gitataw usab niini nga may kapin sa 40 ka pa nga mga kahoy nga nagpangidaron usab og 100 katuig nga angayan usab nga putlon.

Kasamtang nagpadayon ang assessment sa Community Environment and Natural Rerouses (CENRO) Cebu City sa mga kahoy sa syudad sa Carcar nga gihadlokang matumba tungod sa kakaraan na ug gitun-an kun angayan ba usab kining putlon.