DOH7 Mipasalig Pagbantay sa Ebola Virus

Gipasaligan sa Department of Health (DOH) 7 ang katawhan sa Central Visayas nga dili mabalaka sa gikahadlokan ug makamatay nga Ebola Virus nga mikalas na og ubay-ubay nga kinabuhhi didto sa West Africa.

Matud pa sa hepe sa Regional Epidemiology and Surveillance Unit (RESU) Dr. Renan Cimafranca sa DOH-7 nga ang ilang buhatan wala pa makadawat og advisory sa central office sa DOH nga may mga pasahero sa eroplano gikan sa gawas nga angayang monitoron tungod sa maong virus.

Si Cimafranca nagkanayon nga wala usay direct flight gikan sa West Africa paingon sa mga international airport sa Central Visayas ilabina na sa Mactan Cebu International Airport (MCIAA).

Apan bisan pa niini, iyang gitug-an nga ang RESU-7 padayon nga nakigtambayayong sa Bureau of Quarantine sa pagpahigayon og subsub nga scanning sa tanang mga pasahero sa eroplano gikan sa gawas sa nasud, pag-ila sa mga natakbuyan sa maong virus.

Dugang pasalig ni Cimafranca ngadto sa mga moluypyo sa rehiyon nga ang DOH-7 mohimo sa tanang paagi aron pagsiguro nga dili makasulod ang gihadlokan nga matang sa virus dinhi Kabisay-an.

Image Credit: rt.com