Mga Tanod Miangkong Drug-User

Kadaghanan sa mga tanod sa Barangay Ermita miangkon nga sila tiggamitan og gidili nga matang sa drugas ug wala na lang sila magpa-drug test sa mga sakop sa City Office for Substance Abused Prevention (COSAP) nga gipahigayon karong adlawa, Biyernes.

Si Ermita Barangay Captain Felicisimo “Imok” Rupinta miingon nga diha-diha niya nga gitangtang sa pagka empleyado sa barangay ang mao nga mga kawani kay gipa-revoke niya ang tagsa-tagsa nila ka appointments.

Matud ni Rupinta nga gihangyo g’yud niya si COSAP chief Alice Utlang nga himoan og kinalit nga drug test ang iyang 226 ka kawani sa barangay aron mailhan kun kinsa kanila ang drug users.

Si Utlang miingon nga sa 226 ka kawani, 159 lang ang nakatunga ug ang 13 kanila mihangyo nga dili na lang sila i-drug test ug miangkon nga mga tiggamitan sila og gidili nga matang sa drugas.

Gibutyag ni Utlang nga sa 13 ka kawani nga miangkon nga drug users, 11 kanila mga tanod, usa ang tigpanilhig sa karsada ug ang laing usa garbage loader sa barangay.

Sumala pa ni Rupinta nga ang nahisgutang mga kawani giawhag niya nga mo-report sa opisina ni Dr. Utlang kana kun gusto sila nga mo-avail og voluntary drug rehabilitation.

Matud ni Utlang nga adunay gihan-ay na nga mga activities alang niadtong gusto nga mo-avail og out-patient drug rehabilitation ug anha nila timbang-timbanga kun angay ba sila nga irekomendar nga papadayonon sa pagtrabaho sa barangay.

Si Kapitan Rupinta miingon nga ang sunod niya nga lakang mag-depende na sa rekomendasyon gikan ni Dr. Utlang.

Daghan ang nakapanglingo-lingo nga kadaghanan diay sa mga tanod sa Ermita mga adik. Base sa balaod, ang matag barangay gitugotan lang nga adunay labing daghan 20 ka tanod nga mopatuman sa balaod sa ilang teritoryo.

Ang barangay Ermita usa sa mga barangay dinhi sa dakbayan sa Sugbo nga giisip nga grabe’ng nasudlan sa problema sa illegal nga drugas.