Bata Patay Human Nahilo sa Buriring

Daghan ang miingon nga lami kan-on ang isda nga “buriring” apan usahay makahatag kini og kakuyaw kay adunay mga higayon nga makahilo ang mao nga matang sa isda.

Kini maoy hinungdan nga namatay ang usa ka 7-anyos nga batang lalaki kay matud pa nahilo sa gikaon nga tinowa’ng buriring nga gisaw-an sa tibook pamilya didto sa Poblacion, lungsod sa Bantayan.

Ang namatay nga bata giila nga si John Clifford Negro samtang ang iyang mga kauban sa pamilya pareho nga gidala usab sa ospital kay gikatahong nalanag sa gikaon nga buriring.

Ang inahan sa bata nga si Marivel maoy una nga mireklamo nga gibati og pagpanglipong human makakaon sa tinowa nga buriring. Misunod pagreklamo ang iyang bana nga si Armando, ug ang mga anak nga sila si Aidelyn, 15, Jophen, 17, Armando Jr., 14, Niña Marie, 9, Arbel, 5, Jahmeia, 2.

Ang mao nga mga pamilya apil sila sa mga biktima sa bagyo nga Yolanda ug gani hangtod karon nagpuyo pa sa mga tulda nga gipagamit kanila sa kagamhanan.

Dihang namatay na ang bata, ang ubang mga biktima nga sakop sa iyang pamilya gibalhin sa Vicente Sotto Memorial Medical Center aron mahatagan og dugang pag-atiman sa mga doktor.

Image Credit: www.marketmanila.com