Awto Nasunog sa Tunnel

Awto nga kusog kaayo’ng nagdagan paingon sa South Road Properties (SRP) agi sa tunnel sa Plaza Independencia kalit lang nasunog Domingo sa kaadlawon mao nga ang tunnel gisirad-an og kapin sa tulo ka oras.

Si Joy Tomulak, operations chief sa City Traffic Operations Management (CITOM), mitug-an nga ang nasunog nga kotse gimaneho ni Jose Lorenzo Retuya, 23, ulitawo nga taga Barangay Basak-San Nicolas.

Wala hinuon makaangkon si Retuya og kadaut sa ilang lawas kay abtik siya nga nakapahunong ug migawas sa sakyanan sa wala pa kini masunog lapas ang alas kuwatro sa kaadlawon.

Sa imbestigasyon sa mga sakop sa CITOM nahibaw-an nga paspas ang pagpadagan ni Retuya sulod sa tunnel ug pag-abot niya sa likuon nga bahin kalit lang mitalipsay ang likud nga bahin sa awto ngadto sa bung-bong sa tunnel.

Human mabanda ang likud nga bahin sa kotse ngadto sa sementado nga bung-bong sa tunnel, nalagpot na usab kini ngadto sa pikas bahin sa sementado nga tunnel.

Gituohan nga tungod sa kainit sa pagbag-id sa lawas sa kotse ngadto sa semento nga bung-bong sa tunnel nakamugna kini og kayo ug misilaob tungod sa gasolina.

Si Retuya abtik kaayo nga nakagawas sa kotse ug nagtan-aw na lang sa misilaob ang mao nga sakyanan. Gipasusi ni Tumulak sa mga sakop sa Department of Public Works and Highways (DPWH) kun aduna bay kadaot nga namugna ang mao nga hitabo.