LTFRB-7: Strike Dili Tukma

Gitataw sa kadagkoan sa Land Transportation Franchising and Regulatory Board (LTFRB) nga dili tukma nga ang mga drayber mohimo og transport strike kun adunay dili mauyonan.

Si LTFRB-7 Regional Director Ahmed Cuizon mitataw usab nga dili tinuod nga ang kagamhanan wala mopahigayon og public hearing diha nga giplano nila ang pagmugna sa kontrobersyal nga Joint Administrative Order 2014-01.

Ang mao nga kamandoan nga giisyu sa LTFRB ug Land Transportation Office (LTO) nga gisugdan na sa pagpatuman kaniadtong Hunyo 19, nagpausbaw sa kantidad sa multahan sa madakpan nga mga drayber.

Si Director Cuizon nagkanayon nga dinhi sa Sugbo ang public hearing gihimo diha sa Sacred Heart Center sa dalan D. Jakosalem kaniadtong Abril 10 karong tuiga.

Atol sa public hearing didto sa Cebu City Council kagahapon, ang presidente sa Metro Cebu Taxi Operators Association (MCTOA), misaway pag-ayo sa pagpatuman sa JAO-2014-01.

Matud ni Richard Cabucos nga base sa kamandoan sa DOTC, sila nga mga tag-iya og taxi makamulta og dako ingon man marebokar pa ang ilang prangkisa kun ang ilang mga drayber madakpan nga dili mopasakay og pasahero.

Gipasabot ni Cabucos nga dili kini makiangayon kay dali ra kaayo sila makamulta ug matangtangan sa ilang prangkisa kun maglagot kanila ang ilang mga drayber.

Ang mga drayber nga sakop sa grupo nga Piston nga maoy sagad magpahigayon og welga, miingon nga dili gayud makiangayon kanila nga mga drayber ang mao nga kamandoan sa DOTC.

Matud ni Greg Perez, ang lider sa Piston sa Sugbo, nga maglaom sila nga tabangan sa mga konsehal ug mohimo sila og awhag ngadto sa mga ahensya nga hingtungdan aron undangon na ang pagpatuman sa mao nga balaod.

Duna pa’y mga laing misulti atol sa public hearing kagahapon nga misaway pag-ayo sa kontrobersyal nga Joint Administrative Order.

Ang Acting Regional Director sa LTO nga si Arnel Tancinco mihimakak nga ang pagpatuman sa Joint Administrative Order 2014-01 gitumong aron makakolekta sila og dako nga kita gikan sa multa sa mga drayber.

Matud ni Tancinco nga ang kamandoan gitumong aron nga mahadlok na ang mga drayber, ilabi na ang mga nagmaneho og public utility vehicles, sa paghimo og kalapasan sa lagda sa pagmaneho’g sakyanan.