Gipasaka na sa Korte ang Kaso Batok sa 2 ka Negosyante’g Langgam

Pormal na nga gipasakaan og kaso sa Department of Environment and Natural Resources (DENR) 7 ang duha ka negosyante nga nadakpan nga namaligya og mga langgam atol sa buy bust operation nga gilusad didto sa barangay San Roque syudad sa Talisay sa miaging semana.

Ang kaso gisang-at sa korte sa hepe sa Protected and Wildlife Division sa DENR-7 Arnel Rica, mao ang paglapas sa Sec. 27 sa Republic Act 9147 nga naila nga mao ang “The Wildlife Resources Conservation and Protection Act.”

Ang nag-atubang og kaso sa Provincial Prosecutor’s Office mao sila si Stephen Ng Sy, 34, nga taga C. Padilla Street, Cebu City ug Alberto Primor, 27, nga taga Lagtang, Talisay City.

Ang duha nasikop sa hiniusang team sa DENR ug sa mga membro sa Provincial Environment Task Force sa Kapitolyo, diin ang duha namaligya og 6 ka Umbrella Cockatoo, 2 ka Philippine Hawk Eagles, 1 ka Crested Serpent ug 1 ka Brown Dove, pulos nga mga nihit na nga klase sa langgam.

Ang mga suspetsado nasakpan sa akto sa ilang negosyo sakay sa usa ka blue Toyota Revo (WKP 241) niadtong Hunyo 27, 2014.

Matud pa ni Rica nga lig-on ang ilang kaso nga gipasaka batok kang Sy ug Primor tungod kay kompleto ang mga ebidensiya ingon man mga testigos batok sa duha.

Midugang si Rica nga sa higayon nga makonbikto sa maong kaso ang duha ka mga akusado, posibling mapahamtangan sila og silot nga pagkabilanggo gikan sa 6 ka tuig ngadto sa 12 ka tuig ug pamultahon gikan sa P100,000 hangtud sa P1,000,000.

Image Credit: cebudailynews.inquirer.net