Tigbaligya’g Armas Napusilan, Sikop

Napusilan ug nadakpan ang usa ka gidudahang gun runner atol sa “buy-bust operation” didto sa Sitio Humay-Humay, Barangay Gun-ob, dakbayan sa Lapu-Lapu kagahapon, Domingo.

Si Tomas Alvarico Codilla, 32, lumad nga taga Matag-ob, Leyte ug nagpuyo sa Barangay Paknaan, dakbayan sa Mandaue nakaangkon og samad-pinusilan sa iyang tiyan.

Mga sakop sa Criminal Intelligence Bureau (CIB) sa kapolisan sa Mandaue ang nakapusil ni Codilla, kinsa anaa karon sa tambalanan.

Si PO3 Renato Inot sa CIB-Mandaue City mibutyag nga siya maoy nagsilbing poseur buyer ug nakigsabot ni Codilla nga mopalit og armas human nga adunay nakatug-an kanila nga ang suspek nalambigit pagpamaligya og armas.

Ang sabot mao nga adto unta sa Paknaan ang himuon ang pagbaligya sa armas diin si Codilla adunay kaubang lalaki nga maoy nagdala sa bag luwan sa usa ka motorsiklo.

Si Codilla ug kauban niini nga gunrunner miawhag nila ni Inot nga adto nila himoa ang binayranay sa Lapu-Lapu mao nga miabot sila sa Sitio Humay-Humay.

Didto na sa Lapu-Lapu gipakita ni Codilla kang Inot ang KG9 nga machine pistol, apan mipahibalo nga aduna pa’y laing duha niini ug laing 45 kalibre nga pistol nga anaa sa bag sa iyang kauban.

Diha’ng nangayo’g laing KG9 si Inot, ang kauban ni Codilla nga gunrunner nakabantay nga dunay nagbagal nga armas ang tawo nga buot mopalit kanila’g pusil.

Napugos si Inot pag-ibot sa iyang giluklok nga armas kay mihana paghulbot og pusil ang kauban sa gunrunner. Si Codilla misuway pag-ilog sa armas ni Inot apan sa ilang paglayogay, ang armas mibuto paingon sa tiyan sa gunrunner.