Rehistrasyon sa Adlawng Domingo Ipahunong

● Sukad niadtong Mayo, 7,226 ang natalang nagparehistro sa adlawng Domingo sa tibuok Sugbo, kasagaran niini gikan sa syudad.

Tungod sa kagamay sa nagparehistro, ang Provincial COMELEC Office nagtinguha nga undangon na ang voters’ registration sa adlawng Domingo sa mga kalungsoran sa lalawigan sa Sugbo.

Matud pa ni Provincial Election Supervisor Atty. Lionel Marco Cstillano nga ang ilang rekomendasyon ila nang gipadangat ngadto sa mga ulohang buhatan sa COMELEC.

Sigon pa ni Castillano nga base sa ilang mga record nga nahipus sa duha ka bulan nga pagpatuman sa continuing registration sugod niadtong Mayo, nitala lamang og 7,226 ang nagparehistro sa adlaw nga Domingo sa tibuok Sugbo ug kasagaran niining nagparehistro nanukad sa syudad sa Sugbo.

Hinuon, iyang gitataw nga mikabat og kapin sa 61 mil ang katibuk-ang nagparehistro sa Sugbo sulod sa naasoy nga duha ka bulan. Subay niini, si Castillano nagkanayon nga ilang gilakip sa ilang rekomendasyon nga ibalik sa adlawng Lunes hangtud sa Biyernes ang registration sa kalungsoran sa lalawigan samtang Domingo hangtud Biyernes ang registration sa syudad sa Sugbo ug ubang mga dakbayan niini.

Gitumbok hinuon niya nga ang ilang buhatan magpaabot sa ipakanaug nga desisyon sa COMELEC Manila kalabot sa ilang giduso nga rekomendasyon nga hunongon na ang voters’ registration sa maong adlawng sa kalungsoran dinhi sa lalawigan sa Sugbo.