Ordinansa sa ‘Solo Parents’, Gibalibaran sa Mayor

●Gihulagway ni Rama ang ordinansa nga “discriminatory” kay ang walay paltang nakabotar sa tulo ka milabay’ng eleksyon ang mabulahan niini.

Siguradong maminghoy ang mga solo parents sa dakbayan sa Sugbo tungod kay wala aprobahi ni Mayor Michael Rama ang gisugyot nga ordinansa nga magpahatag unta kanila og ‘tag P5 mil nga hinabang-salapi kada tuig.

Ang Cebu City Council miaprobar kaniadto’ng Mayo 7 sa City Ordinance 2395 nga naglatid paghatag og cash assistance sa mata’g solo parents kun padayon nila nga giatiman ang ilang gagmay’ng anak.

Apan si Mayor Rama wala mopirma sa ordinansa kay gihulagway niya kini nga “discriminatory” tungod kay ang ordinansa
naglatid nga kadto ra’ng mga nakabotar na sa miaging tulo ka sunod-sunod nga eleksyon ang makapahimulos sa benepisyo sa maong balaodnon.

Ang mayor nagkanayon nga ang maong ordinansa nga gisugyot ni Konsehal Gerardo Carillo gikopya sa Republic Act 8972, apan matud ni Rama ang nasudnong balaod wala maglatid nga ang tabang sa kagamhanan mao kadto’ng nakabotar sa tulo ka miaging eleksyon.

Gitan-aw usab sa mayor ang pagsaway sa pipila ka sektor nga ang paghatag og cash assistance sa mga solo parents makapadasig sa uban nga mohimo’g “pre-marital sex” kay tabangan man sila sa kagamhanan.

Apil sa giisip nga solo parents, base sa ordinansa ni Carillo, mao kadtong mga kapikas sa mga binilanggo nga padayong miatiman sa ilang mga anak.

Si Carillo milantugi nga dili na maka-veto si Mayor Rama tungod kay ang ordinansa giaprobahan kaniadto pa’ng Mayo 7 apan ang iyang Vetoe Leter nadawat sa konseho sa miagi lang Hunyo 9.

Ang konseho sa dakbayan nagkauyon nga ang isyu itugyan sa committee on laws and ordinances aron tun-an pag-ayo og ilang hisgutan sa sunod nga sesyon.

Image Credit: www.inewmedia.org