Panahon sa Ting-init, Maayong Higayon Pagsumpo sa Lamok Dengue

●Bulan sa Abril mirehistro nga labing daghan og itlog ang lamok nga Aedes Aegypti-ang nailang tigadala’g kagaw sa Dengue

Panahon sa ting-init ang maayong higayon sa pagsumpo sa itloganan sa mga lamok nga nagdala sa dengue virus matud pa sa usa ka pagtuon.

Sumala pa ni Dr. Frances Edillo sa University of San Carlos nga nag base sa pagtoon nga gihimo niadtong tuig 2012, nga ang bulan sa Abril ang mirehistro nga maoy labing daghan og itlog ang lamok nga Aedes aegypti-ang nailang kagaw nga nagdala sa sakit nga dengue sa tibook nasud.

Nasusi sa maong pagtoon nga ang “mother Aedes” nga lamok magsugod og pangitlog panahon sa ting-init ug gilaoman nga pag- abot sa ting-ulan, modagsa ang daghang kaso sa dengue nga mamaak sa daghan nga katawhan.

Ang maong pagtoon gihimo sa upat ka lugar sa Syudad sa Sugbo diin nasusi nga gamay ang kaso sa dengue panahon sa ting-init apan modaghan panahon sa tinguwan.

Ang research team ni Dr. Edillo migamit sa Polymerase Chain Reaction (PCR), diin nakita gikan sa sample sa DNA ang tulo ka klase nga dengue serotypes nga nailang DENV-1, DENV-3 ug DENV-4.

Kini nga pagtoon gipadayag ni Dr. Edillo atol sa selebrasyon sa ika 32 nga anibersaryo sa Department of Science and Technology-Philippine Council for Health Research and Development.