Dos Mil Kapin ka Magtutudlo Gikinahanglan

● DepEd-7 miingon nga ang populasyon sa mga tinun-an ning karong Hunyo misaka, daghan usab nga magtutudlo miretiro na.

Kapin sa 2 mil ka mga magtutudlo ang gikinahanglan sa Department of Education (DepEd)-7 alang dinhi sa Sugbo ug sa ubang lalawigan sa Sentro Kabisay-an karong abli sa klase sa Hunyo ning tuiga.

Kini aron sila maoy motudlo sa nagkadaghan nga populasyon sa mga tinun-an ning pagsugod sa school year 2014-2015.

Sumala ni DepEd-7 Regional Director Carmelita Dulangon nga gawas sa wala pay bag-ong mga item, ang kakulang sa naasoy nga mga magtutudlo mahitabo tungod sa daghan usab sa mga magtutudlo nga miretiro na sa ilang pagtudlo ning tuiga.

Malaumon hinuon si Dulangon nga dali rang makapangita og mga kalipikadong mga magtutudlo alang dinhi sa Sugbo ug sa ubang bahin sa rehiyon tungod usab sa kadaghan sa mga nakapasar sa Teachers Board Examination niining tuiga.

Gipahibawo usab ni Dulangon nga hapsay nga nagpadayon ang pagpang-enroll sa mga eskwelahan ug wala pa siyay nasugatang mga problema.

Hinuon subli niyang gipanhimangnoan ang mga magmatutudlo nga dili gyud mangulekta og amotan ngadto sa mga ginikanan nga magpa-enroll sa ilang mga kabataan.

Midugang siya nga ang iyang buhatan dili gyud mangpanuko sa pagsilot niadtong mga magtutudlo nga makalapas sa ilang gipatuman nga “no collection policy”.