Estudyanteng Biktima sa Bagyo’ng Yolanda, Dawaton sa Sugbo

●Tinun-an gikan sa mga lugar nga naigo sa kalamidad dili balibaran sa tulunghaan sa Sugbo bisan walay dokumento.

Gimando sa Commission on Higher Eduction (CHED)-7 ug Department of Education (DepEd)-7 nga dawaton sa mga pribado ug publikong tulunghaan dinhi sa Sugbo ang mga tinun-an nga mo-transfer gikan sa mga tulunghaan sa amihanang bahin sa lalawigan sa Sugbo, Samar, Leyte ug Bohol, mga lugar nga gikusokuso sa bagyong Yolanda ug sa linog nga mitay-og sa Bohol sa miaging tuig.

Kini bisan pa kun dili sila kapakita sa ilang dokumento nga nagmatuod sa ilang pagtungha sa tulunghaan kay nalakip usab sa pagkaguba sa bagyo ug sa linog.

Sigon pa ni Dr. Josefino Ronquillo, Education Supervisor II ug Education Program Specialist sa CHED-7, nga ang ilang gibasehan sa pagpagawas sa maong kamanduan mao ang mando gikan sa ulohang buhatan sa CHED.

Kini human makadawat ang ilang buhatan og ubay-ubay nga hangyo gikan sa mga ginikanan sa mga kabataan nga nabiktima sa bagyo lakip na sa nabiktima sa linog didto sa Bohol.

Giklaro ni Ronquillo nga ang mga tinun-an gikan sa mga lugar nga naigo sa kalamidad dili balibaran sa mga tulunghaan sa college dinhi sa Sugbo kun dili makapita og mga dokumento tungod kay nagusbat sa bagyo.

“We’d ordered by the CHED Chariperson nga ipa accommodate and then to be given a particular period to recover those records. As long as buhi pa ang inyong faculty o dean maka-certify gyud na kay nakahibawo man sa inyong talento kun makapasa ba o dili,” sigon pa ni Ronquillo sa interview sa radyo ngadto sa mga mo-transfer nga mga tinun-an.

Samtang gipahibawo usab ni DepEd-7 Regional Director Carmelita Dulangon nga mipagawas na usab siya og susamang mando ngadto sa tanang mga pribado ug publikong tulunghaan dinhi sa Sugbo ug sa ubang probinsya sa Central Visayas.

Matud pa ni Dulangon nga ang ilang buhatan motabang usab sa mga tinun-an sa pagkompleto sa mga nawagtang mga dokumento sama sa birth certificate.

Dugang pa ni Dulangon nga ang mga nagdumala sa eskuwelahan ang maningkamot sa paghangyo sa kanhi tulunghaan sa mga mo-transfer nga mga tinun-an dinhi sa Sugbo aron pagkompleto sa mga papelis ug hingpit kining makatungha unya sa pagbukas sa klase.