Grupo sa Pamuo Magpakitabang sa Malacañang

Magpakitabang sa Malacañang ang mga labor sector dinhi sa Sugbo sa pagpa-resign sa opisyal sa Department of Labor and Employment (DOLE)-7 nga nagdumala sa National Labor Relation Commission (NLRC).

Sumala pa sa pangulo sa Living Wage Coalition mga si Metudio Belarmino nga usa o duha ka semana gikan karon ilang ihatud ang ilang petisyon ngadto sa buhatan ni Presidente Noynoy Aquino aron pagpamatuod sa ilang awhag nga papahawaon ang mga opisyal sa DOLE ug NLRC tungod kay wala kini magtagad sa kaayohan sa mga mamumuo.

Si Belarmino miingon nga ilang gipetisyonan nga papakanaugon sa iyang katungdanan si assistant regional director sa DOLE-7 nga si Lilia Estillore ug ang nagdumala sa NLRC 2nd division nga ilang gihulagway nga “anti-poor”.

Gisuwayan ning tigbalita sa pagtawag ang landline ug cellphone ni Estillore aron sa pagkuha sa iyang reaksyon sa maong taho, apan buzy pa kini.

Matud pa ni Belarmino nga base sa ilang nahipos nga mga dokumento sa mga kaso sulod na sa 20 ka tuig gikan sa mga mamumuo nga mga sakop niini nga ang naasoy nga mga opisyal midapig kanunay sa mga gikihang mga magpapatigayon.

Midugang si Belarmino nga ang tanang labor group mipaluyo sa naasoy nga petisyon hinungdan nga daghan ang mipirma sa ilang petisyon nga ilang iduso sa buhatan sa presidente.

Iya usab nga gipahibawo nga mohatag unya sila og kopya sa kalihim sa DOLE sa higayon nga madawat na sa presidente ang ilang petisyon.