Kompanya sa Mina Migahin og P155 Milyones Alang sa Molupyo

●Gitaganang Pundo, alang sa Sugbo ug sa Sentro Kabisay-an, motubag sa nag-unang panginahanglanon sa mga nagpuyo duol sa minahan.

Misaka og 334 porsento ang gidak-on sa gahin nga gitagana sa mga kompaniya sa mina dinhi sa Sugbo ug sa Central Visayas alang sa nagkadaiyang social development and management programs (SDMP) niini.

Usa sa maong mga programa mao ang pagpalambo sa panginabuhi ug pagpuyo sa mga kasigbit nga komunidad sa kompanya sa mina.

Sumala ni Mines and Geosciences Bureau (MGB) 7 Regional Director Loreto B. Alburo nga niining tuiga mikabat og kapin sa P155 milyones ang pundo nga gitagana sa mga mining companies alang sa pagtubag sa nag-unang panginahanglan sa mga nagpuyo duol sa ilang minahan.

Iyang gitataw nga sa miaging tuig, mikabat lang sa P46.415 milyones ang gigahin sa mga minahan alang sa maong katuyoan.

Matud pa ni Alburo nga ang Cebu maoy gigahinan og labing dako nga kantidad nga mikabat og P 147.102 ka milyon, ang Bohol P7.573 milyones, Negros P.250 milyones, ug Siquijor P149 mil.

Midugang si Alburo nga sa 9 ka mga mining companies sa Central Visayas nag-una sa labing dako og poundo mao ang Carmen Copper Corporation sa Toledo City. Kini maoy labing dako nga minahan sa copper sa tibuok nasud ug nagbinugtong sa iyang pagka- metallic mines sa Central Visayas.

Migahin kini og P127.969 ka milyon sa iyang mga programa alang sa katawhan sa iyang palibot.

Gisundan kini sa Philippine Mining Service Corporation-Alcoy Dolomite Mine/Dolomite Mining Corporation sa Alcoy nga may P6.680 milyones; Apo Cement Corporation/Apo Land and Quarry Corporation P4.6 milyones; JLR Construction and Aggregates Inc. sa Naga city P1.9 milyones; Quarry Ventures Philippines Inc. sa City of Naga may P1.275 ka milyon; Taiheiyo Cement Philippines Inc./Solid Earth Development Corporation sa San Fernando P4.687 milyones.

Ang Philippine Mining Service Corporation-Bohol Mine/Bohol Limestone Corporation sa Garcia-Hernandez, Bohol may P7.573 milyones; Heirs of Arturo Zayco/Holcim Philippines sa Ayungon, Negros Oriental adunay P0.250 milyones; ug Lazi Bay Resources Development Inc. P0.149 milyones.

Dugang pa ni Alburo nga natala nila ang dakong pagsaka sa gahin sa mga mining companies tungod sa ilang hugot nga pag-monitor sa pagpatuman sa social development projects sa maong mga minahan.

Kini human imando ni DENR Secretary Ramon JP Paje nga ang tanang komunidad makapahimulos sa makiangayon nga pahat gikan sa kita sa mga mining contractors pinaagi sa pagpatuman og mga livelihood ug ubang susamang mga programa.

Image Credit: www.pimagazine-asia.com