Pagtaptap sa Baba sa Masuso, Imbistigaran sa CHR

●Gikatahong gitaptapan og plaster sa usa ka Nurse ang baba sa bata kay napungot sa tiyabaw niini

Gawas sa Cebu Puericulture Center and Maternity House ug Department of Health (DOH)7, ang Commission on Human Rights (CHR)7 moimbistigar usab sa gikataho nga usa ka nurse mipapilit og tape sa baba sa usa ka bata nga bag-ong natawo sa Cebu Maternity Hospital sa miaging adlaw.

Kagahapon adlawa, ang mga imbestigador sa CHR-7 nga sila si Lelibeth Lluna ug Primo Cadampog mibisita sa buhatan sa Cebu Maternity Hospital ug nipahigayon sa ilang initial ug informal nga imbestigasyon kalabot sa maong hitabo.

Nasayran nga napungot ang nurse sa kasipa sa siyagit ug tiyabaw sa maong bata hinungdan nga mikuha kini og tape ug gibangot sa baba sa bata.

Si Lluna nga nahinabi sa mga sakop sa media nagkanayon nga ilang gisusi ang maong report pinaagi sa pagpakighinabi sa nurse ug sa mga opisyal sa naasoy nga hospital. Gipahibawo hinuon niini nga ilang gipaabot ang resulta sa meeting sa mga membro sa board sa Cebu Puericulture Center and Maternity House basi sa taho kagahapon.

Iya usab nga gipahibawo nga magkinahanglan sila sa sinumpaang pamahayag sa mga ginikanan sa bata nga gibaatan og plaster ang baba sa bata sa nurse sa nahisgutang hospital.

Kini aron hingpit silang makahimo og tukmang lakang batok sa gikatahong dili makatarunganon ug dili makatawhanong gihimo sa nurse ngadto sa bag-ong natawo nga bata.

Gitataw usab ni Lluna nga makig-alayon una ang ilang buhatan sa mga opisyal sa naasoy nga hospital ug labaw sa tanan sa mga ginikanan sa bata aron pagsuhid kun may tulubagon ba ang nurse ingon man ang nagdumala sa hospital.