Karaang Bus, Jeep Dili na Padaganon

Hugtan pa unya sa pagpatuman sa Land Transportation Franchising and Regulatory Board (LTFRB-7) ang modernization program niini sama sa ilang gipatuman na nga pagdili sa mga karaan na nga mga bus, mini bus ug mga public utiltiy jeepney (PUJ) nga nagpangidaron na og 15 ka tuig pataas aron malikayan ang posibling aksidente sa kadalanan.

Sigon pa ni LTFRB-7 Regional Director Ahmed Cuizon nga ang hugot nga pagpatuman sa mga programa sa natad sa trasportasyon maoy usa sa nag-unang gihisgotan atol sa gipahigayon nga Transport Summit nga gisalmotan sa mga opisyal sa LTFRB, Land Transportation (LTO) ug ubang transport sectors sa region 6, 7 ug 8.

Wala na hinuon niini idetalye ang uban pang mga modernization program sa ilang buhatan nga ila unyang hugtan sa pagpatuman.

Si Cuizon miingon nga padayon nilang ipatuman ang nahisgutang nga ban bisan pa man og nakaduso na og petisyon ang mga kahugpungan sa mga bus operator dinhi sa Sugbo nga nangayao og 3 hangtud sa 5 ka tuig nga moratorium sa naasoy nga lagda sa LTFRB.

Kini tungod kay ang maong petisyon wala madesisyoni sa Department of Transportation and Communication (DOTC).

Nasayran nga sugod niadtong Pebrero 1, 2014 gipatuman sa LTFRB ang pagdili na sa pagdagan sa mga bus, mini bus ug mga PUJ nga nagpangadaron og 15 anyos pataas human sa sunod sunod nga aksidente sa mga bus didto sa kaulohan nga nikalas ug ubay-ubay na usab nga mga kinabuhi.

Image Credit: en.wikipedia.org