‘Satellite Registration’ Ipatuman sa Comelec

Nagplano ang Commission on Elections (Comelec) nga mopahigayon og satellite registration sa mga piniling lugar sa kalungsoran ug syudad sa lalawigan sa Sugbo aron mahatagan usab og kahigayonan ang mga bag-ong botante nga nagpuyo sa lagyong dapit nga makaparehistro niining gilusad nga continuing registration.

Sumala ni Election Officer Atty. Ferdinand Gujilde sa Comelec provincial office nga ila kining ipahigayon duha ka bulan gikan karon. Gipasabot niya nga sa bulan pa sa Hulyo o kaha sa Agusto nila ipatuman ang nahisgutang satellite registration tungod kay gipaabot pa sa ilang buhatan nga mohubas ang gidaghanon sa mga bag-ong botante nga nagparehistro sa tanan nilang opisina sa probinsiya niining unang bulan sa pagpatuman sa continuing registration.

Dugang pang gitinguha karon sa Comelec mao nga daghan ang ma kaparehistro karon aron makabotar sa umaabot nga presidential ug local nga election sa tuig 2016.