Awhag sa HPG 7, Wala Tuguti

Gibalibaran sa hukmanan ang awhag sa PNP Highway Patrol Group (HPG)-7 nga ipakita ang mga testigos sa National Bureau of Investigation (NBI)-7 nga nagpasangil nga gitagoan diha sa ilang vehicle impounding area sa Lahug ang mga sakyanan nga gigamit pagbanhig patay kang Atty. Noel Archival.

Matud sa kadagkoan sa NBI nga si Regional Trial Court (RTC) Executive Judge Soliver Peras mihukom nga ang pagpresentar sa ilang gigamit nga witness mahimo nga pagahimoon atol na sa “trial proper” sa kaso batok sa mga opisyal ug sakop kanhi sa HPG-7.

Wala pa usab mohukom si Judge Peras kun angayan ba nga ideklarar nga walay bili ang search warrant nga giisyu og nagtugot nga rondahon sa NBI ang vehicle’s impounding area sa HPG-7 didto sa Sitio Sudlon, Lahug.

Ang tinguha sa pag-file og Motion to Quash Search Warrant mao nga kun kini aprobahan sa korte, kadtong kotse ug ubang butang nga na-recover sa NBI gikan sa impounding area dili na mahimo nga gamiton isip ebidensya batok sa mga opisyal ug sakop sa HPG-7.

Nasakmit sa NBI ang usa ka pula nga Toyota Vios nga kotse nga giingon’g apil sa gisakyan sa mga armado’ng tawo nga gigamit sa mga mibanhig kang Archival ug kaubanan didto sa Barangay Coro, Dalaguete kaniadtong Pebrero 18.

Gawas ni Archival, duha sa iyang mga kauban ang namatay ‘sab ug ang usa nasamdan.

Ang upat ka opisyal ug sakop sa HPG-7 nga gipasakaan og kaso nga multiple murder ug frustrated murder sa NBI sa kalambigitan sa pagpatay kang Archival mao sila si Koronel Romualdo Iglesia, Senior Inspector Joselito Lerion, Chief Inspector Eduardo Mara, SPO4 Edwin Galan ug PO1 Alex Bacani.

Matud ni Atty. Inocencio dela Cerna, abogado sa mga akusado, nga walay igong basihan ang pag-isyo sa search warrant batok sa iyang mga kliyente.

Nasayran sa NBI nga ang mga sakyanan nga gi-impound sa HPG-7 ila ra diay nga gamit-gamiton pinaagi sa paggamit og lainlain nga plate numbers aron dili mailhan sa mga tag-iya.

Nangangkon ang NBI nga ang mao’ng mga sakyanan gigamit pagbanhig kang Archival.

Image Credit: cebudailynews.inquirer.net