Mga Bag-ong Botante Nagdasok sa Buhatan sa Comelec

Nagsugod na sa pagdasok ang mga bag-ong botante sa buhatan sa Commission on Election (Comelec) kagahapon, Martes, atol sa pagpahigayon sa unang adlaw sa pagpatuman sa continuing registration.

Apan wala pay mga taho gikan sa Comelec nga may mga kakulian o kasamok nga nahitabo atol sa unang adlaw sa nagpadayong rehistrasyon.

Gipahibawo hinuon ni Comelec-7 Regional Director Atty. Timmy Lambino nga bisan og andam na ang ilang buhatan sa maong kalihukan, limitado lamang ang madawat nga bag-ong botante nga magparehistro sa ilang buhatan.

Tumong niini mao nga makabotar sila sa piniliay sa tuig 2016 apan gikinahanglan usab nga makapahulay ang ilang gigamit nga mga computer ug capturing machines alang sa mga bio-metric record sa mga bag-ong botante nga magparehistro nga nagpangidaron og 18 anyos pataas.

Giangkon ni Lambino nga hangtud karon nagkulang gihapon ang mga computer sa Comelec alang unta sa labing dali nga pagparehistro sa mga bag-ong botante.

Apan iyang gipahibawo nga may dugang dili mominus sa 500 ka mga computer ang ipadala sa iyang buhatan gikan sa Comelec Manila ug ila usab kini nga ipang-apod-apod ngadto sa mga syudad ug kalungsoran dinhi sa Sugbo ug sa ubang probinsiya sa Central Visayas.

Subay niini, si Lambino nanawagan ngadto sa mga botante nga mosayo sa pagbisita sa buhatan sa Comelec aron magparehistro ug dili magpaabot sa kataposang adlaw sa voter’s registration.

Si Lambino mitumbok usab nga ang mga botante dili magpaabot sa satellite registration sa kabarangayan ug adto gyud magparehistro sa ilang buhatan tungod sa naasoy nga limitasyon.

Gipahibawo usab niya nga ang mga nagtrabahong mga botante may higayon gyud sa pagparehistro sanglit ang ilang registration ipahigayon dili lamang sa adlaw nga Martes, Miyerkules ug Huwebes kun dili apil na usab sa adlaw’ng Sabado ug Domingo hangtud sa kataposang bulan sa tuig 2015.