Mayor Nabiktima

Human nga gilungkab ug gikawat ang sakyanan ni Central Visayas PNP Director Danilo Constantino, ang mga kawatan mibiktima na usab sa balay sa mayor nga nahimutang didto sa Barangay Babag, dakbayan sa Sugbo.

Ang balay ni Mayor Rommel Arnado gilungkab mga kaadlawon kagahapon Lunes. Si Arnado maoy mayor sa lungsod sa Kauswagan, Lanao Del Norte apan adunay balay sa Barangay Babag.

Nakuha sa kawatan gikan sa balay ni Mayor Arnado naglakip sa usa ka diamond ring, ladies watch nga nagkantidad og P15 mil, iPad nga 700 dolyares, iPhone nga P30 mil, kalibre .45 nga pistola kantidad ug P15 mil nga kuwarta.

Matud ni Mayor Arnado nga wala gayud siya makabantay nga nakasulod ang kawatan sa iyang balay.

Sa pakisusi sa mga sakop sa Theft and Robbery Section (TRS) sa Cebu City Police Office (CCPO) nahibaw-an nga ang kawatan mipugos pag-abli sa sliding door sa kuwarto sa mayor.