Tiggama’g ‘School Supply’ Ipatawag sa DTI

Gitakdang ipatawag sa Department of Trade and Industry (DTI)-7 ang mga tiggama sa mga school supply dinhi sa Sugbo bahin unya sa presyo sa ilang mga baligya.

Hisgutan sa DTI ang mga lakang nga malikayan ang subra nga pagpataas sa presyo sa mga educational supply niining pagbukas sa klase unya sa Hunyo.

Sumala ni DTI-7 Regional Director Asteria Caberte nga sulod niining bulana, pakigtagboan niya ang mga pabrika sa mga materyales nga gamiton sa mga estudyante sa eskuylahan.

Tuyo ni Caberte nga maabot ra kanunay ilabi na sa mga kabus nga estudyante ang presyo sa maong mga produkto, aron dili mabug-atan ang mga ginikanan sa gastoanan sa mga anak nilang motungha unya inig-abli na sa klase.

Gusto usab ni Caberte nga mapahimangnuan niya ang mga naggama og mga school supply, lakip na ang mga nagkalain-laing materyales sa edukasyon dinhi sa Sugbo ug sa ubang lalawigan sa Central Visayas nga dili magpatuyang sa pagpasaka sa ilang presyo aron dili sila maimbistigar.

Dugang pa niya nga pihuon usab sa ilang buhatan nga ang mga chemical nga gigamit sa paggama sa mga school supply dili makadaut sa mga kabataan.