Lumba sa Langoy, Bugsay Gikalingawan sa Mandaue

Singgit ug abiba maoy misibaw didto sa kadagatan ilawom sa Marcelo B. Fernan Bridge sa dakbayan sa Mandaue kagahapon Dominggo, diin gipahigayon ang lumba sa paglangoy ug lumba sa pagbugsay og sakayan.

Pwerte’ng lingawa sa mga nanan-aw kay ang mga misalmot sa luma migamit g’yud sa tanan nila’ng kusog aron malupig ang ilang mga kontra.

Una pa kini nga lumba sa paglangoy ug lumba sa pagbugsay og sakayan nga gipahigayon sa dakbayan sa Mandaue kabahin sa tinuig nga pangilin ni Senyor San Jose, ang patron sa siyudad.

Ang kalihukan didto gihimo sa baybayon duol sa Mandaue Bridge Park, ilawom nga bahin sa Marcelo Fernan Bridge sa Barangay Umapad.

Sa lumba sa langoy, adunay 10 ka tawo ang miapil og naglumbaanay sila’g langoy sa usa ka kilometro ug tunga.

Ang 29-anyos nga si Jucel Serafica, taga Barangay Looc, maoy midaog ug midawat sa P3 mil nga premyo.

Si Jaime Parawan nga taga Barangay Looc, Mandaue maoy giila nga labing kusog mobugsay sa iyang sakayan human niya gibiyaan ang laing siyam ka sumasalmot nga giawhag nga humanon ang tulo ka kilometro nga lumba. Tres mil pesos ang nadawat nga ganti ni Parawan.

Adunay laing lumba diin grupo sa lima ka tawo ang magbanus-banos pagbugsay sa usa lang ka sakayan.Kada usa mobugsay bali’g tulo ka kilometro, ug mobanos ang lain niini nga kauban, hangtod nga makahuman ang lima kanila.

Ang grupo nga taga Barangay Looc maoy midaog ug ilang naangkon ang ganti nga P5 mil.