DOLE: ‘Unemployment Rate’ sa CenVis Mikibra

Gipahibawo sa Department of Employment Labor and Employment (DOLE)-7 nga mikibra karong bulana ang unemployment rate dinhi sa Central Visayas.

Kini tungod sa gitanyag nga trabaho sa nagkadaiyang mga kompanya dinhi sa nasud ug sa gawas sa nasud atol sa gipahigayon nga job fairs sa nagkadaiyang mga lugar dinhi sa lalawigan ug ubang mga probinsiya sa tunga-tungang Kabisay-an.

Sumala pa ni DOLE-7 Regional Director Chona Mantilla nga nakatabang kaayo ang 17 mil ka mga job vacancies nga gitanyag sa naasoy nga mga job fair niadtong Mayo 1 ning tuiga nga gipasiugdahan sa ilang buhatan.

Apan gitataw ni Mantilla nga ilang gitutokan karon ang pagsaka na usab sa unemployment rate sa mosunod nga bulan tungod sa kadaghan sa mga migraduwar sa kolehiyo nga mangita og mga trabaho.

Iyang gitataw nga ang DOLE-7 kanunayng nakig-alayon sa mga kompaniya alang sa dugang employment sa mga trabahante.

Hinuon iyang sulti nga makatabang usab ang gitanyag nga trabaho sa Department of Social Welfare and Development (DSWD)-7 alang sa pagpatuman sa ilang programa niining ikaduhang kwarter ning tuiga.

Dugang pa ni Mantilla nga ilang gipaningkamotan nga mokunhod gyud ang unemployment rate sa Central Visayas base sa gitinguha sa Malacañang nga mahatagan og trabaho ang kinabag-ang mga Filipino niining tuiga ug sa umaabot nga katuigan.