DTI Nagmonitor sa Presyo sa Nag-unang Palaliton

Gihugtan na sa pagmonitor sa Department of Trade and Industry (DTI)-7 ang nag-unang palaliton sa kamerkadohan dinhi sa Sugbo ug sa ubang probinsiya sa Central Visayas sugod niadtong Biyernes.

Sumala pa ni DTI-7 Regional Director Asteria Cabarte nga may mga inspector ang ilang buhatan nga gitahasan sa pagsusi sa mga presyo sa nag-unang mga palaliton nga sagad maoy komprahon sa mga konsumedor.

Kini aron may kabasehan na usab ang ilang buhatan nga presyo sa mga baligya nga maoy gamiton sa pagtandi sa presyo sa mga palaliton sa higayon nga may mahitabong kalamidad sama sa bagyo ug linog sama sa miaging tuig.

Hinuon gipahibawo ni Cabarte nga sa pagkakaron wala pay namatikdan ang ilang buhatan nga misakang mga presyo sa nag-unang palaliton.

Ang labing gitutokan karon sa ilang buhatan mao ang presyo sa housing materials sanglit panahon man karon sa pagpatukod ug mga edepisyo tungod kay init ang panahon.

Hinuon mokalma lamang kining maong mga gimbuhaton sa panahon sa ting-uwan sanglit mabalda man ang pagtrabaho sa mga edepisyo.