Konsehal sa Brgy. Gi-isyhaun og Citation Ticket sa CESET

Laing konsehal sa barangay dinhi sa dakbayan sa Sugbo giisyohan og citation ticket sa City Environmental Sanitation Enforcement Team (CESET) tungod sa nagkatap nga mga basura sa Barangay Duljo-Fatima.

Si Grace Luardo, hepe sa CESET, mitug-an nga si Konsehal Cecille Alicaya giisyohan nila og citation ticket tungod kay siya man maoy tsirman sa committee on environment sa Duljo-Fatima.

Matud ni Luardo nga nakadawat sila og reklamo nga adunay mga basura nga wala mahipos sa Duljo-Fatima mao nga iyang gisusi kagahapon og didto nakita niya nga tinuod ang mao nga report.

Wala pa makuhai og pamahayag si Konsehal Alicaya kabahin sa pag-isyu kaniya og citation ticket.

Sa laing bahin, susihon usab sa CESET ang report nga daghang mga basura ang wala na gayud hakota didto sa Sunrise Village, Poblacion-Pardo. Matud pa nga daghan ang mireklamo kay si Kapitan Althea Lim wala dayon moaksyon sa reklamo sa mga molupyo.

Samtang kadto’ng konsehal sa Guadalupe nga gitiketan usab sa Ceset kaniadtong Abril 19, giandaman na og kaso kay matud ni Luardo wala g’yud gihapon kini mohimo’g paagi nga malimpyo ang maong barangay.

Ang giandaman og kiha sa CESET mao si Konsehal David Susara nga nagdumala sa committee on environment sa Guadalupe.

Matud ni Mayor Michael Rama nga suportahan niya ang lakang
ni Luardo nga ang mga konsehal nga nagdumala sa mao nga komitiba ang isyuhan og citation kun nasubay kini sa lagda.