Lumad Basakanon Grand Champion sa Aliwan Festival

Ang mga contingents sa Lumad Basakanon mihatag na usab og dakung garbo sa dakbayan sa Sugbo human niini gipilde ang tanang misalmot sa Aliwan Festival didto sa Pasay City ug gideklarar nga grand champion niadtong Sabado.

Ika-upat na kini ka higayon nga ang Lumad Basakanon nahimong grand champion sa Aliwan Festival kay gani nabutang na man kini sa Aliwan Hall of Fame human maangkon ang tulo ka sunod-sunod nga kadaugan gikan sa 2006.

Ang katawhan nga misaksi sa Aliwan Festival kaniadtong Sabado naglumpayat sa kalipay ug mihugyaw sa kahimuot diha nga misugod na pagsayaw ang mga contingents nga maoy nagrepresentar sa dakbayan sa Sugbo.

Gidaug usab sa Lumad Basakanon ang Best in musicality ug Best in costume awards.

Gani ang Sinulog festival queen dinhi sa Sugbo nga si Steffi Abarasturri nga misalmot usab sa mao nga kalihukan gideklarar usab nga Reyna ng Aliwan 2014.

Gidaug usab sa Sinulog Queen ang Best in Gown, Swimwear, National Costume ug ang Unique Smile special awards.

Ang dakbayan sa Sugbo migasto og P1.6 milyones aron sa pagpadala sa mga 200 ka contingents sa Lumad Basakanon nga mosalmot sa Aliwan Festival.

Human mabutang sa Aliwan Hall of Fame, ang Lumad Basakanon wala na makaapil kay kuwang sila og budget nga magamit sa pagpadala og contingents sa Pasay City.

Mga opisyal sa dakbayan sa Sugbo nga naglakip ni Mayor Michael Rama, Vice Mayor Edgardo Labella ug pipila ka konsehal apil na si Ricky Ballesteros nga maoy executive director sa Sinulog Foundation Incorporated miadto gayud sa Manila aron sa paghatag og suporta sa grupo.

Ang mga Aliwan judges miingon nga nahukman nila nga ideklarar nga Grand Champion ang Tribu Lumad Basakanon tungod sa nindot nila nga pasundayag.

Kini tungod sa kanindot sa choreography, dungan kaayo ang lihok sa mga dancers ug uban pa. Nakakuha og P1 ka milyon ug trophy ang Lumad Basakanon contingents.