Kontrata sa Supplier sa Krudo, Giputol na sa City Hall

Gikanselar na sa dakbayan sa Sugbo ang kontrata niini ngadto sa Phoenix Petroleum, ang supplier og krudo ug gasolina sa City Hall, bisan og ang mao nga kompaniya aduna pay kolektahonon nga moabot og P30 milyones gikan sa kagamhanan sa dakbayan.

Matud ni Mayor Michael Rama nga gipirmahan niya kaniadto’ng Huwebes sa hapon ang dukomento nga nagputol na sa kontrata sa dakbayan ngadto sa fuel supplier nga gikontrata unta pagsuplay og krudo ug gasolina sa kantidad nga P105 milyones.

Matud ni City Administrator Lucelle Mercado nga gikanselar nila ang kontrata tali sa Phoenix Petroleum Company kay wala gayud sila malipay diha’ng ang mao nga fuel supplier miundang pagsuplay og gasolina sugod kaniadtong Abril 11.

Matud ni Mercado nga bayaran nila ang tanang gasolina ug krudo nga na-supply na ngadto sa dakbayan.

Si City Treasurer Diwa Cuevas miingon nga ang mga bayranan sa gasolina nga moabot sa iyang opisina iya dayon nga mahimoan og tseke kay prayoridad nila ang bayranan sa kuryente, tubig ug gasolina.

Karong giputol na sa dakbayan ang kontrata ngadto sa fuel supplier, ang City Hall mopahigayon og subasta aron dapiton ang lainlaing fuel supplier nga interesado nga mo-supply og gasolina sa dakbayan.

Human mihunong ang Phoenix Petroleum pag-supply og gasolina sa dakbayan kaniadtong Lunes, ang City Hall mihimo og emergency purchase og gasoline gikan sa Autogas.

Matud ni City Treasurer Cuevas nga kun adunay pay wala kabayri nga gasolina gikan sa Phoenix, wala kini malangan diha sa iyang opisina kun dili possible nga tua pa kini sa Accounting department.