SM Andam na Mohimo’g Karsada sa SRP

Andam ang SM Prime Holdings Incorporated nga mogasto og minilyon ka pesos aron paghimo og karsada daplin sa dagat nga nahimutangan sa yuta nga ilang napalit diha sa South Road Properties (SRP).

Si Sherry Tuvilla nga manager sa SM Mall mipadala og suwat ngadto ni Vice Mayor Edgardo Labella nga misanong sa awhag sa Cebu City Council.

Ang mga konsehal sa dakbayan miawhag sa tagdumala sa SM Prime Holdings Incorporated ug sa Filinvest Land Incorporated nga sila ang mohimo’g karsada palibot sa property nga ilang napalit diha sa SRP.

Ang SM nakapalit og 34 hectarya nga kayutaan diha sa SRP nga gihimoan nila karon og higante nga mall nga matud pa kun kini mahuman, usa kini sa labing daku nga mall sa Asya.

Ang Filinvest Land Inc. nakapalit usab og 10 ka hektarya nga kayutaan nga anaa sa beach front apan hitsas na kini sa karsada nga gitukod sa kagamhanan.

Matud ni Tuvilla nga andam sila sa SM nga mohimo’g karsada sa seaside nga bahin sa napalit nila nga property habig sa Barangay Mambaling, apan kinahanglan nga ang ilang magasto isipon kini nga advance tax payment ngadto sa dakbayan.

Ang konseho sa dakbayan mitugyan niini nga isyu ngadto sa City Treasurer’s Office aron makahatag ang mga tax collectors og baruganan.

Ang SM nakahatag na og P50 milyones nga advance tax payment kaniadto ubos sa kondisyon nga gamiton ang salapi
pagpanindot sa karsada palibot sa SM Mall sa North Reclamation Area ug pag-atiman sa Mahiga Creek.