Labaw og 218 Botos

Ang Barangay Pasil dinhi sa dakbayan sa Sugbo aduna na unya’y bag-o nga kapitan human gideklarar sa hukmanan nga maoy tinuoray’ng midaog sa miaging eleksyon sa barangay kaniadtong Oktobre.

Human sa pag-ihap pag-usab sa resulta sa eleksyon didto sa hukmanan, si Judge Monalila Tecson sa Municipal Trial Court in Cities (MTCC) mideklarar nga si Francisco De Gracia Jr. maoy tinuod nga mananaog og labaw kini og 218 botos kay sa nakuha ni Julius Guioguio.

Si Guioguio maoy gideklarar nga mananaog human g’yud sa eleksyon pinaagi sa mga sakop sa Barangay Board of Canvassers. Si Guioguio alyado sa Bando Osmeña Pundok-Kauswagan (BOPK) samtang si De Gracia supporter ‘sab sa Team Rama.

Human sa eskutinyo atol sa eleksyon sa barangay kaniadtong Oktobre, ang mga sakop sa Barangay Board of Canvassers mideklarar nga si Guiguio maoy midaog pinaagi sa labaw nga 150 botos batok ni De Gracia.

Si De Gracia miawhag sa hukmanan nga iphon pag-usab ang mga balota. Wala ‘sab makadawat si Guioguio nga si De Gracia maoy gideklarar nga mananaog pagka kapitan mao nga miapelar siya sa disisyon.

Apan si De Gracia mihangyo ni Judge Tecson nga tugotan siya nga makalingkod pagka kapitan mentras wala pa ang hukom sa pag-apelar ni Guioguio ug gitugotan siya sa huwes.

Si Mayor Rama wala mopapanumpa ni De Gracia kagahapon bisan og iya kini nga alyado sa politika tungod kay wala kini makapresentar og Writ of Execution nga gikan sa huwes.

Kini maoy nakaaghat ni De Gracia nga didto na lang nanumpa atubangan ni Atty. Rilven Christian Virtudazo nga maoy iyang abogado. Ang pagpanumpa didto himoa sa opisina sa secretary ni Mayor Rama.

Ang mga dumadapig ni De Gracia miuban kaniya pag-adto sa City Hall ug mahinangpon kaayo nga nakapanumpa na ang ilang kapitan.

Mipasalig si De Gracia nga paninguhaon niya nga masumpo ang illegal nga kalihukan sa Pasil, sama sa pagpamaligya og shabu ug ang gidili nga mga sugal.