Dugang Dokumento Mopalig-on sa Kasong Pagpatay kang Archival

Ang National Bureau of Investigation (NBI)-7 moduso og dugang dokumento sa fiskaliya aron mopasamot kalig-on sa gipasaka nila nga kaso batok sa mga opisyal sa PNP Highway Patrol Group (HPG)-7 nga gipasanginlan nga nalambigit pagpatay kang Atty. Noel Archival.

Matud ni NBI-7 Regional Director Max Salvador nga paninguhaon nila nga mamatud-an g’yud nga sad-an ang mga suspetsado nga nag-atubang karon og kaso nga multiple murder ug frustrated murder.

Wala hinoon motug-an si Salvador kun unsa ang dugang dokumento nga iduso nila sa fiskaliya nga miawhag na sa mga suspetsado nga mosumiter sila sa ilang tubag sa kaso.

Ang gipasakaan og kaso sa NBI mao sila si HPG-7 regional director Romualdo Iglesia, Senior Inspector Joselito Lerion, Chief Inspector Eduardo Mara, SPO4 Edwin Galan ug PO1 Alex Bacani.

Gipasanginlan sa NBI ang mao nga mga opisyal nga may kalambigitan sa pagbanhig ug pagpatay kang Atty. Archival ug sa duha niya ka kauban dihang gibanhigan sila didto sa Barangay Coro, Dalaguete kaniadtong Pebrero 18.

Matud ni Salvador nga anaa ra sa tagdumala sa Witness Protection and Benefits Program sa Department of Justice (DOJ) kun kinsa ang mga saksi nga ilang hatagan og proteksyon.

Kun ang kaso mapasaka na sa hukmanan, ang NBI mangayo og “look out order” aron dali ra makit-an ang mga sinumbong.

Samtang gimugna na sa Cebu Provincial Prosecutor’s Office ang usa ka grupo sa mga prosecutors nga mo-imbestigar ug motimbang-timbang sa mga ebidensya nga ilang gisang-at batok sa mga suspetsado.

Ang panel of prosecutors gilangkoban nila ni Prosecutors Petronio Elesterio, Jay Paradiang, Rustom Presas, Jr., Ferdinand Collantes ug Al Rey Ouano. Matud sa NBI nga lig-on ang mga ebidensya nga ang sakyanan nga gisakyan sa mga mibanhig ni Archival mga impounded vehicles sa HPG.