Mayor Nanghatag og Bag-ong Kahimanan sa mga Badlongon nga Mangingisda

Aron pagkumbinsir kanila nga mobiya na sa illegal nga matang sa pagpangisda ginamit ang baling nga pino kaayo’g mata kon fine-meshed nets, si Cordova Mayor Adelino Sitoy mihatag og kahimanan sa pipila ka mangingisda sa Barangay Pilipog sa miagi nga semana.

Ang gipanghatag ni Mayor Sitoy naglakip sa pumpboat nga hitsas sa makina, mga pukot ug traysikad nga magamit sa mao nga mga mangingisda aron madugangan ang ilang kinitaan.

Pito ka mangingisda ang gihatagan og tagsa ka pumpboat nga hitsas sa makina, samtang adunay laing duha ka mananagat nga gihatagan og makina sa pumboat. Laing lima pa ka mangingisda nga gihatagan og pukot samtang 26 ang gihatagan og traysikad.

Sa mao nga hugna sa pagpanghatag og hinabang sa pipila lang ka mangingisda, ang kagamhanan migasto og P526 mil kon subra sa tunga sa milyon ka pesos nga kabahin sa P5 ka milyon nga nadawat sa Cordova nga hinabang gikan sa Kapitolyo.

Matud ni Sitoy nga gikapoy na siya nga ang mga asawa sa madakpan’g ilegal nga mangingisda nga taga Barangay Pilipog
kanunay’ng magpatabang kaniya nga dili lang pasakaan og kaso ang ilang mga bana.

Ang paggamit og mga baling ug pukot nga pino kayo og mata nga ubos sa three centimeters giisip nga illegal base sa lagda sa Fishery Code of the Philippines.