City Warden: Mga Piniriso Nagdasok

Ang warden sa Cebu City Jail miingon nga bisan og hutdon pa og padala ngadto sa New Bilibid Prisons sa Muntinlupa ang tanang “insular prisoners” magpabilin nga “overcrowded” ang bilanggoan.

Ang mga insular prisoners mao kadtong mga binilanggo nga nahukman og pagkabilanggo subra sa tulo ka tuig. Ang balaod naglatid nga ang mga insular prisoners dad-on g’yud sa mga national peneteniary.

Si Jail warden Johnson Calub miingon nga bag-ohay lang sila nagpadala og mga insular prisoners sa Muntinlupa apan tungod sa daghang binilanggo nga masulod sa prisohan mata’g adlaw magdasok g’yud ang bilanggoan.

Ang City Jail nga nahimutang sa Barangay Kalunasan nga gidumala karon ni Superintendent Johnson Calub angay lang unta butangan og 1,600 ka piniriso apan sa pagka karon miabot na og 2,228 ang mga lalaki’ng binilanggo.

Base sa jail standard sa United Nations, sa usa ka square meter nga luna, usa lang ka piniriso ang muokopar.

Ang pagpatuman na sa hingpit sa Republic Act 10592 nga maghatag og “good conduct and time allowance” sa mga binilanggo maoy gilantaw nga makatabang pagpadali nga makagawas ang piniriso sa bilanggoan.

Sa mata’g buwan sa ilang pag-estar sa bilanggoan nga magbinuotan, minosan ang mga adlaw sa ilang pagkabilanggo. Kun ang usa ka piniriso magpabilin nga buotan sulod sa daghan’g katuigan, mapadali ra ang ilang katuigan sa pagkapriso.

Matud ni Calub nga nagpaabot pa sila nga ang Implementing Rules and Regulations sa mao nga balaod kapirmahan ni Presidente Aquino.

Image Credit: hazelthompson.photoshelter.com