Mga Operator Naglagot, LTO-Mandaue Gisirhan

Nag-alburoto ang mga bus operators sa kalit nga pagsira sa Land Transportation Office (LTO-7) extension office nga modawat sa tanang “For Hire” Registration Transaction nga nahimutang sa syudad sa Mandaue.

Ang kalihukan sa maong buhatan kutob ra niadtong Marso 14, 2014 ug ang mga transaction niini gibalik na ngadto sa rehiyonal nga buhatan sa LTO sa syudad sa Sugbo.

Sigon pa sa tigpamaba sa mga asosasyon sa mga bus operator dinhi sa Sugbo ug kasamtangang presidente sa Cebu South Mini Bus Operators Association nga si Jolito Flores nga wala sila makasabot nganong gitakpan ang maong buhatan.

Gawas niini, sa maong opisina nga gisirad-an, nakauyon sila kay dili usab sila maproblema sa parking area alang sa ilang mga sakyanan nga iparehistro ug wala usab silay makitang mga fixers.

Apan si LTO-7 Regional Director Arnel Tancinco mipasabot nga ang iyang kamandoan sa pagsira sa naasoy nga LTO extension office gibase usab niya sa memorandum order nga giluwatan ni Department of Transportation and Communication (DOTC) Assistant Secretary Atty. Alfonso Tan Jr. nga nag-recall sa Memorandum Order (MO) niadtong November 19, 1993.

Kini maong MO ang nagmugna sa LTO Extension Office nga nagdawat lamang sa “For Hire” Registration Transaction sa mga public utility vehicles.

Miingon si Tancinco nga natukma usab kaayo nga ang hepe sa naasoy nga buhatan mi-report kaniya nga overstaffed ang ilang office ug gamay ra ang madawat niining transaction hinungdan nga iyang girekomendar nga sirhan.

Tungod niini,ang labaw niining opisyal, mimando nga pasirad-an ang tanang LTO extension office ug ibalik na ang “For Hire” registration sa public utility vehicle ngadto sa mga LTO regional office ug sa mga district office niini.

Si Tancinco mitug-an nga dili na usab mahimong problema sa mga bus operator ang parking area sa ilang pagparehistro sa ilang for hire nga mga sakyanan tungod kay mahimo na man sila nga makaduol sa mga district offices sa LTO.

Samtang gitumbok niini nga ang iyang buhatan dugay na nga mipatuman sa kampanya batok sa mga fixers sa LTO, gani iya dayong himuan og aksyon ang mga kawani nga malambigit sa mga fixer nga nahimo nang kabahin sa iyang gipatuman nga reporma sa ilang buhatan.