‘World TB Day’ Gisaulog

Gilusad kagahapon sa Department of Health (DOH) 7 ang lapad nga kampanya batok sa sakit nga tuberculosis (TB).

Uban sa kasaulogan sa World TB Day, gipahayag sa mga opisyal sa maong ahensya nga matag tuig adunay siyam ka milyon ka tawo ang magmasakit og TB.

Sa tigum sa mga opisyal sa DOH-7 didto sa Parklane Hotel ning dakbayan sa Cebu niadtong Lunes, gibutyag ni TB Coordinator Joceleyn Tabotabo nga sa maong gidaghanon, may tulo ka milyon ka tawo ang dili matambalan.

Mao kini ilang gikampanya nga unta tabangan sila sa publiko sa pagpangita niining tulo ka milyon ka tawo aron katambalan.

Kini sa tinguha nga makab-ot ang ilang target nga himuong TB-free ang Pilipinas sa mga mosunod nga tuig.

Ang tema sa kampanya sa DOH karong tuiga mao ang: “Stop TB: Makialam, Tara Na!” nga ang tumong mao ang pag-aghat sa publiko nga motabang na usab sa mga kampanya batok TB.

Kalabot niini, gikalipay ni DOH Secretary Enrique Ona ang nadawat nga mga suporta gikan sa nagkalain-laing sektor batok sa TB kalabot na usab sa programang KP: Kalusugang Pangkalahatan.

Matud pa ni Ona, gusto nilang makuha ang pakigtambayayong sa publiko aron masiguro nga ang matag Pilipino nga adunay sakit nga TB mapatambalan aron mamaayo sa maong sakit.

Gitambagan sa DOH ang publiko nga kun may mga simtomas sa TB, moadto gayud dayon sa labing duol nga health center alang sa libreng pagpatambal niini.

Image Credit: www.theglobalfund.org